ماطاح من ليل

[عاطف الحربي]

كلام وهذيان في كل شي .. :
.
.

أحيان عند العجز اخون القصيده
......... واشعر بـ ضعفٍ ماشعر فيه إنسان

وألقىْ الحزن يحتاج لحظه سعيد
......... واقول من يقراه .. يهديه الاحزان

قديم هذا الجرح يشبه جديده
......... متشابهات اصواتنا دون عنوان

والفكره اللي راودتني عنيده
......... حاولت اسايرها على كل الاوزان

مدري مسافاتي عليها بعيده
......... والا الشعر ماعاد هو مثل ماكان !

قلت اكتبه ..واعايده قبل عيـده
......... لقيت كل اللي نثرته من ألـوان : ..

قصايدٍ متعلقه فـ الجريده ..
......... مابين غصة خايف وقلب سجّـان !

لا والذي روحي بـ أمره وبـ ايده
......... محدن ذبل غيري من الأمس للآن

ومحدن على كثر الوفا في رصيده
......... مثلي .. ومن مثلي وفا كثر ماخان !!

واللي وقع مابين حلمه وقيـده
......... وش حيلته لامن فقد فيه الايمان ؟!

عاجز وبين 1000 احتمال وقصيده
......... تسكرت بيبـان .. بيبـان .. بيبـان

من ياخذ بـ حلمٍ ذبل في نشيـده ..
......... ويكون له واكون له .. نفس الانسان !

.

[عاطف الحربي]

محـاولة : إثبــات ..

..
.



الإسم : مجهول الوطن والهويّـه
.......... العمر : غصـه من (ثلاثه وعشرين)


اعيش : في كل الجروح النديّـه
.......... ..و ليَ القصـايد ـ عن سواها ـ : عناوين


هوايتي : قطف الحزن في يديّـه
.......... من كل وجـه ٍ من وجيـه المساكين


احلم : بـ صبح ٍ للمحبـه و ليّـه..
.......... مابه سجون ولا ظـلام ومسـاجين


أحب : كل الناس ..لو هم عليّـه
.......... اثقل من الديَن ان لفى راعي الديَن !


موتي : بـ (ضحكة طفلة ٍ ) سرمديّـه
.......... تسري .. واثر ضحكة صداها / بساتين

..

هذا انا , وحـدي اكون الضحيّـه
.......... يوم اسـأل الجدران عني ..: أنا مين ؟!


الحب والاشعار عندي قضيّـه
.......... ياذا البلـد .. لاتجرح الجرح وتلـين !


مالي من الاسرار مقدار فـَيـّـه
.......... من صاحبت (رمضاك) (بوحي) من اسنيييين !



.
.
ــــــــــــــــــــ

الأحـد .. 25/11/1429هـ .. الظهران ـ ......!

[عاطف الحربي]

ليل وطريق وذكريات واغاني
يقرون في صمتي حكايات الاصحاب
.
وانا اللي آعاني واعاني واعاني
نستني الأيـام واقف على الباب !
.
آقف على اطراف الحياة لثواني
والموت يرفض لايجي , مثل الاحباب
.
بعيييييد يا صبح.. اقبل بـ وجه ثاني
الشمس ماعادت قصيده وانا كتـاب !
.
خذ ماتبي .. بس ردني الاولاني
شاب الحنين .. وكل شي ٍ معْه شاب
.
.

طريق الرياض ـ المدينه
4/2/2010
11:26 م

[عاطف الحربي]

كلما ضاقت بصدري سجون القصيد
انكسر غصن واصفرّت مساحـاتها
.
بين صوتي وبين الفجر .. غربة نشيد
لو تحاول تغنّي طوّل سكاتها
.
وانت ياصاحبي دامك على الجرح سِيد
يكفي اتزيد في عيني عذاباتها
.
للوطن غنّ ياصاحب وقل ماتريد
موت نفسك : بشيٍ حَبّت .. وفاتها !
.
لايقيّدك صمتك كن له اليوم قيد
واطلق الروح تكفخ في سماواتها
.
كنت شاعر وذنبك ماهو انك وحيد
ذنبك الناس تشقى في ملذاتها
.
وحدتك جنّة الدنيا وهذا الاكيد
يوم تلمس بعين امك صلاواتها
.
صاحبي لو بغيناها على مانريد
مـ انكتب في دفاترنا نهاياتها
.
خذ يديني وطِر بالهارب من القصيد
واترك لنفسي الركض بـ مسافاتها
.
يمكن ألقى وتلقى موطنك فـ البعيد
يوم تعطي لك الحريّـه اثباتها

.


صباح المدينة اليوم .
27 ـ صفر ـ 1431 هـ
7:55 ص

[عاطف الحربي]

لمّا حياتك تكون السجن والمنفى
من يظهرك من سواد وليل سيّـاتك

في بالك العمْر يضوي لين مايطفا
واللي بقى لك من الايام يقتاتـك

ماينفعك لو تصيح بهالزمن : تكفى !
ولا على الشعر روحاتك وجياتك

تحتاج مرّه على صدر الرضا تغفى
لاذنب لك .. لاندم يحرجك مع ذاتك

[عاطف الحربي]

في دفتري جرح الزمان وفصوله
يقراه من يسمع صدى صمت الاحساس

تمرّه الايام عجلى خجـوله
مرور من يخشى على نفسه الياس

ليت الذي نبغى نقوله .. نقوله
كان القصيد ارتاح وارتاحت الناس

.

[عاطف الحربي]

في المقبلات من الليال
والمدبرات من العمر

وجه القصيده لايزال
امرّ وجهٍ بي يمـر

حاولت .. حاولت ومحال
رفضي لها مايستمر

تشرق لها شمس السؤال
وتنام في حضن القمر

قصيدتي ماهي خيال
هي عمْر واطفالٍ سمر

لو مالها فيني ظِـلال
هي النخيل ام التمر

من قالت لجرحي تعال
مشيت ع الما والجمر

كثير منها مايقال
قليل منها اللي يمر

قصيدتي .. نبض ارتحال
ايام وسنين وعمْـر !

.

[عاطف الحربي]

.

شعر(ن) كتبته مالقيت الرضا فيـه
مثله مثل هذا السفـر بالمعاناه

هذا السفر واللي بوجهي مواريه
لو يآمن سكوتي انا مآمن شفـاه !

قصيدتي .. خوفي عليهـا يسلّيه
وافكارها تبقى حبيسـة خطاياه

ياكثر ماتسرق (سنيني) مسـاريه
ومن الغبـا .. ياكثر ماموتي احيـاه

ليت السكوت اللي اشيله يكفيـه
والا ليا مني قدرت .. اقدر انساه

سنين من عمر الاغاني مخاويه
لو ما ظلال الذاكره مين خاواه !

صوت القديم من الجروح ولياليه
يترك على جدران الايام ماطاه

اسمع على بيبـان روحي خطاويه
واشتاق له شوقي لـ بُعده وفرقـاه

واللـه ماهو من تعب رحت اغنّيه
هذا القصيد اللي يجيني على ارضاه

بس السفر واللي بوجهي مواريه
لو يآمن سكوتي .. انا مآمن شفـاه !


ــــ
الخبر .. 19/11/1431هـ

[عاطف الحربي]

افزّ من نومي
تتبعثر حلومي
أرمي لحاف البارحه
وظنون اهلها الجارحه
وقلبي على يومي !

.. منهو يطق الباب ؟!
من يا إنت من ؟!
ماعاد فيه احباب
غابوا من زمن
صمتي حديث اغراب
صوتي من شجن
لو يرجع الغيّـاب
مارِجعْ الزمن

غمضت عن بُكره
مشغول انا بالامس
مآحب .. مااكره
وانت القمر والشمس !

..
.

[عاطف الحربي]

يتسلل البرد من جدراننا خلسه
واصافحْه في دفا حرفي وكفّيـه

وحدي .. ينام الكلام وتنطفي شمسه
وابقى مع الليل .. لا هذي ولا ذيّـه !

نخيل روحي يشيخ .. وفالسما غرسه !
وتجف الاحلام وسنيني مزاجيّـه

تساقط العمر واحساسي بدا عكسـه
ماني بعادي لو الايام عاديّـه !

من لاقراني .. جهل شي اكبر بـ نفسه !
واللي نساني .. عطاني ذاكره حيّـه

...

[عاطف الحربي]

مُرني قبل الكلام
وزورني بعد الكلام
بارده كفّي بدونك
يادفاي اللي بعيونك
لو نسيت (الحُب) وش ذنب الليالي ؟!
تفقدك .. ويّا الحمام !

.

[عاطف الحربي]

.


ذكـراك ماتمطـر ولا تتـرك لنسيانـي عـذر
كـم مـرّت الايـام وعيونـي تنـام وماانـام

آمنت بغيابك ولو فجـأه .. وبعضـي ماقـدر !
هذا هو الموت الطويل يعـود ويشيـب الكـلام

اخاف من خوفي على الباقي واخااااف من القدر
ياااارب .. انا عبدك فلا تلحق ضما نفسي مـلام

اركض وهذا العمر يتركنـي اضيـع بـلا عمـر
لولاي شاعر قالت الدنيا على مثلـي : سـلام

اقرى ملامح كل شـي ٍ حـيّ فينـي ماشعـر
لين القلق يكبر ويزرعني على جفـون الانـام

هذي حكاياتـي : قصايـد مالنـا عنّـا مفـر !
لاحـب لامنفـى ولاحلـم وصباحـات وحمـام

اموووت من ثقل الكلام الخايف وطعـم السهـر
او فكرة اني جيت للدنيا قبـل مليـون عـام !

للذاكـره جـلاّد ياربـي وسـجّـان وسـفـر
محتاج للنسيان لو لحظات عـن هـذا الحطـام

بعضي رفض بعضي وكان الشعر من فاز وخسر
راسي من الاصوات يملاني زحام ٍ فـي زحـام

مالي من ايامي سوى اوهامي وانا مالي أثـر..
لولاي شاعر خوفي من الجاي .. علمني الكلام

[عاطف الحربي]

.

انتي من انتي - لو تفارقنا - وانا منهو انا ؟!
محتاج بعض احيان عن هذا السؤال .. احيا واموت !
.
تحت الظلام ابقى على شانك ويكبر بيننـا
شي اجهله .. لكنه اقرب من كلامي والسكوت
.
نحلم .. تسمّين اول اطفالك ونبني بيتنـا
وانتي وانا اللي بيننا ماتاسعه كل البيوت
.
بس اعذريني لو خرج حرفي من ثياب العنا
واختارني ارحل مع احزاني : صدى من غير صوت !
.
واقول ياليت البلد يدري ويمسح روسنـا
دريت انا لكني آداري واداري لايفوت
.
اسوار تمنعني عن الايام .. مثل ضروفنا
واحلامنا في بطن حوت
فـ بطن حوت
فـ بطن حوت !
.
عشان وجه امي اغمض عن حزين احوالنا
خوفي على بكره يجي مثل امس .. وانسى لااموت !
.
وانا عشان اكذب على جرحي .. كتبتك بيننا
ليعود لي عمري .. ويرجع للصدى مليون صوت !
..
.

[عاطف الحربي]

اذا طالت مشاوير السكوت انتـثرت اسراره
وانا خوفي تجي فـ بال الكلام اللي ابي ينساك !

اخون الشعر لاجلك والقصايد حيل ثرثاره
تذكرني بكل اللي فقدته وآخـرة فرقـاك

كتبتك للزمان وللمكـان العاليهْ اسواره
ولكن يوم جيت اقراك لأمي ماقدرت اقراك

.

[عاطف الحربي]

نهار وجهك .. به تفيّـا ظلالي
مشيت من عمري له سنين من نور

قالت لي الايام عنّـه .. وانا لي
قلبن لطفل بتهمة العقل مأسور !

خلوني اكبر .. مادروا عن خيالي
انا نسيت اكبر نسيت اضبط الدور

عرفت احب الناس فيك ..ولحالي
بكيت كل اللي احبه ( ورى السور ) ..

.

[عاطف الحربي]

.


هذي حروفي وذا جرحي تعال اقرا
واترك لروحي - اذا تسمح - زواياها
.
مااخترت للشعر فيني غربة المسرا
اختارني ينكتب للناس واقراها
.
قصيدتي في سطور اوراقي الصفرا
يبْست وانا في يدي باقي أثر ماها !
.
تضحك وتبكي وانا بشعورها أدرى
تحت السطر .. اخرج من الموت واحياها
.
تركتها للنجوم اتسـامر القمرا
وتردني للسنين وحلوْ مسراها
.
ايامنا من يبـاب لـ جنةٍ خضرا
حتى كبرت وغرقت بـ زحمة اشياها
.
لو كل غايب رجع لي .. جرحها يبرا
واكفيت روحي خطاياي وخطاياها
.
هذا انا - مع اسف جرحي - اذا تقرا
بس اعطني موطن اشعاري ومنفاها



,

[عاطف الحربي]

..


ياشيخ ! لاتاخذ فـ بالك ولاتشـره
متعوّد ألبس ثياب البارد الشاحب
.
لاتشغل اللوم في صاحبْـك وتحشـْره..
مابين ماهو كـَرَه في نفسـه وما حَب !
.
خلـّه كما هو مع الليل ومع الدشره
يرافق بـ همّ جيله .. صاحب وساحب !
.
..واحوالنا عابره في موجز النشره
والوضع في كف (صمت اصواتنا) ناحب
.
لا ْ تلومني ماقدرت ابقى على العِشره
والعذر بي ضاق , وانته لك صدر راحب
.
مديون .. عايش على ابطاقات ابو عشره
وهالشي .. ماعاد خلاّ لي ولا صاحب !!

[عاطف الحربي]

خلف الحزين من الصور والقصايد
نامت على حلمٍ تناسى وعَـدها !
.
طفله .. تغنّي للسهر والوسايد
عن فرْحها لامن ذبل فوق يدْهـا
.
قالت وهي تِلبس جروحي قلايد : ..
ماكلّ من راد السعاده وجدها

..

[عاطف الحربي]

على الباب القديم آقف
وبعيوني دموع - من الكلام - اقرب
امدّ إيدي ..
وافكر ألف مرّه اهرب !
.. ومايمدي


,

[عاطف الحربي]

جرح العتيق من الصور في عيونك
يبـان مهما قلت طيّب ومرتاح
.
وانا اعْرفك من كثر مايجهلونك
عندي سكوتك : همس .. واحيانا اصياح
.
ارفض بعالي الصوت وحشة سجونك
كن ماتبي .. واخلق من القيد مفتاح !

..

[عاطف الحربي]

لولا السمـا .. كم عاش صابر على الارض !
او كم يعيش بساحة العمر حرفـي !!
.
تركض بي الايام بالطول والعرض
اهدي عيون الناس حزني وضعفي
.
ياموطني .. كيف الرضا ينفرض فرض !!!
والصمت ينشكّ بنواياه خلفي !
.
زرعت ورده .. ماخربت بْيدي أرض
وخرجت من عنق الجهاله بـ عرفي !
.
انا المواطن صاحب الديَن والقرض
في رحم وعروق الوطن عشت منفي !
.
لولا السمـا مالي وعيشة هل الارض
حريتي .. حاجة يقيني وحرفي !

..

[عاطف الحربي]

.

ماتروي الدنيا ضمـا خاطر حسين
بعد السنين الهاربات فـ شبابه
.
بين الفقر ومكافح الديَن بالديَن
يركض بـ عمْره والدروب اتشابه !
.
لا بيت لا راتب شهر لا عناوين
لا حلم لا احدن سأل عن غيـابه
.
في هامش الايام عاش الامرّين
نار الضروف وبرد ليل اغترابه
.
ياسيدي ..
يابو الكرم والقوانين
لو فيك تكفيني شرور الكتابه
.
في هالزمن ياسيدي كلنا حسين !
لو نختلف .. في الاختلاف انتشابه
.
عجّل .. ترى الاحوال من طين في طين
حق البشر .. طـاحت عليه الذيـابه !!

..

[عاطف الحربي]

.

امدّ كفي لسقف الغرفه الباليه
تعبان فقدك وطعم ورايحة هالحنين

امدها لين ترجع لي وهي خاليه
واحس بالفقد في صدري بـ حجم السنين

خايف رياح الزمان اتهبّ ياغاليه
واظل وحدي كما جذعٍ نحيلٍ حزين ..

وتطيح بعْدك جروح القلب متّاليه
وتهزني .. لين مايتساقطوا الغايبين

وانا من الله اخاف اللحظه التاليه
اللي بها خطوة المشتاق عن خطوتين !

لو في عيوني مكان لـ نظرةٍ ساليه
كان فـ غيابك .. تلحقتك بـ عذرٍ سمين

من مُرّ الايام ادوّر ضحكةٍ حاليه
تطلق من الصدر تنهيد الكلام السجين

عمري ورق .. والمفارق ريح ياغاليه
قد ايش باقي من الايام لو تحسبين !

اظهر من الليل .. للصبح .. لـ سما عاليه
وارجع خليّ اليدين ..
ارجع خليّ اليدين ..


..

[عاطف الحربي]

.


يكون الشعر سجني لو كتبته داخل الاقواس
وانا ماني بشاعر ياهلي والحبر سجّـانه
.
انا اقول السمـا ارض(ن) لخطْو ارواحنا تنداس
اذا طير الشعر حريّتـه اسرت بجنحـانه
.
كتبنا ماكتبنا والقصيدة :
حلم
شارع
ناس
تلوّنها الحياة وكل وجه احيـا على شانه
.
تشيب الذاكره والنار تحطب لهفة الانفاس
شتـاك يعود يافصل الحنين وترجع احزانه
.
من البارح وانا اسولف لجرحي عن ظنون الناس
واحس ان الكلام يشدني ويخاف نسيـانه
.
وانا خوفي من الليل الطويل الشاعر الحساس
يعلقني على باب الكلام وبرد جدرانه !


..
.

[عاطف الحربي]

بين من جا يواسيني ومن راح
كانت اتمرّ .. صورتك البهيّـه

تشبه الصبح .. مستبشر ومرتاح
كنّك اتقول : لاتقلق عليّـه ..

تبتسم لي .. وبي تجتاح تجتااااح
كل عرق ٍ ثناه الفقد فِيّـه

وين ألاقيك يانزّاع الارواح !
خذ معك عمري الباقي هديّه

ونام ياسيّد الاشعار وارتاح
راضي ٍ عنْك خلاّق البريّـه

,

[عاطف الحربي]

كل شي ٍ يصغر بعمري معاي الا سؤالي ..
عن حياتي بين صفحات القديمه والجديده
.
في جدار الذكريات الغابره شابت ظلالي
وانحنى صبري ولحظات القلق جداً عنيده !
.
آآه انا لو بعض اسامينا تشابهنا فلا لي
من ورىْ اسمي مايكفيني للايـام البعيده
.
اشعر بـ جرحي يناديني متى ماطاب فالي
والسفر بالذاكره غرقااااان بالدمع ونشيـده
.
وآآه لو يدرون عن صوتي وعمره وارتحالي
ولو يشوفون الجراح اللي على ظهر القصيده
.
ماكتبته للصباح يموت في بعض الليـالي
وماشطبته .. ينقرى بعضه فـ صفحات الجريده
.
"الحياة اغصان" يثمر بعضها ويجفّ تالي ..
والسنين اوراق فيها قصتي تذبل وحيده !

.

[عاطف الحربي]

للسما .. كل ماغنّيت طاحت حمامه !
لين ضاقت سما وارض الاغاني عليّه
.
جرّموني وانا ماريد غير السلامه
يوم نامت حزين ارواحهم في يديّه
.
ميّل السطر وحروفي ينادن علامه !
قلت انا ماعلى الدفتر ملام وعليّه
.
قبل فجر انتصاري ماتقوم القيامه
بس ياسارق الايام .. صبرك شويّه

.

[عاطف الحربي]

اسكر الباب خلفي ضايق ومُتعَب
وارمي على الكرسي..انفاسي وراميها
.
و اتيـه في ليل غير الليل.. ليل ارعب..
..قصايدٍ .. ماقرتهـا عين قـاريها !!
.
قصايدٍ للحبايب سهلهـا يصعب
عنْهم / لهم / منّهم .. تعشب محانيها
.
هذا السفر بالسهر مجنون كيف اهرب ..
والوحده (اكثر من الوحده) لياليهـا !
.
زمااان يالعمر .. حلمك لاكبر .. ملعب !
تطيش به روح الاطفال وغناويها
.
كم كنت زاهي وصدر ايامنا أرحب
والناس كانت قريبـه من اساميها !
.
كم كنت لـ قلوبنا واشعارنا الاقرب
بـ ظلالك حروفنا تحيـا معانيهـا
.
ناديت للصبح لكن جاوب المغرب
ياليت الاحبـاب لو تسمع منـاديها !!
.
من خلف الابواب جيت بصوتي المُتعَب
والروح تتكسـر بـ دربي خطاويها
.
هارب من العمْر للنسيـان , والمرعب : ..
الوحده (اقسى من الوحده) ليـاليها !

..
.

[عاطف الحربي]

http://n4hr.com/up/uploads/e6e158b911.jpg


...

سافر بنا خذنا لنا لآخـر الروح
سيّـل بصوتك دمع الايام ابرتاح

ماطاح من ذكراك بالصمت مفضوح
وياااقلّ ماننسى .. ويااااااكثر ماطـاح

جرحك يطبّب كل مابي من جروح
لمّا الاغاني تِلبسه ليل وجناح !

يشدني من وين ماجيت اباروح
واحس به من وين مارحت يجتااااح

تركت لي بابٍ على الشمس مفتوح ..
حزن الظلال الخايفه خوف الارواح

"لو حبت النجمه النهر" تعشب سفوح !
وينام في حضن القمر خافق(ن) ناح

ياانت لو تجرح إلى الصبح مسموح
لي من خساراتك ولك كل الارباح

سفر اغانيك ومداين لها روح
سافر بنا واجتاح واجتاااح واجتاااااح

ماطاح من ذكراك بالصمت مفضوح
ويـا قِلّ ماننسى ويـا كثر ماطـاح

للناس كنت وكنت بالناس والبوح : ..
سرّ الحنين لبعض من جـا ومن راح

..
,

[عاطف الحربي]

هذا صباحك يالرياض وصباحي ..
فجرك حنون ومشرقك باب الاشعار ..

اقطف لك اللي مستوي من جراحي ..
واقرا لك المنسي من اوراق الاسرار ..

نام الكلام وماورى الصمت صاحي ..
وانا حبيس الجرح الاول والاسفار ..

ليت السما تعتق عشانك جناحي ..
وآخذ معي صبحك وضحكات الاشجار ..

،

[عاطف الحربي]

الوطن في ذكرياتي
في تفاصيل التفاصيل الصغيره في حياتي
الوطن ابسط واعمق
الوطن ماله حدود
الوطن معنى وجود
الوطن لو قلت لك في كل حاجه ..
حسستك بقيمتك .. مثل الامومه
الوطن ماهو حكومـه

.