.. عزف منفرد

[عايض الظفيري]

.
محمد بن منصور :

من مكاسب المنتدى .. ومفاجأه حقيقية وجميلة بالنسبة لي على الأقل


.

[عايض الظفيري]

.

راشد النفيعي :

لك في القلب أكثر من كلمات
ولك في عنقي أكثر من دين .. أعرف أنه لايهم رجل نبيل مثلك قدره العطاء .. لكن حسبي أنك قابلت من هم أكثر مني جحودا .. أنا هنا لأحييك رغماً عن أنف نواف التركي الذي يمنع فتح متصفحات ترحيبية .


.

[عايض الظفيري]

مناحي النفيعي :
أسم ملفت ومختلف .. يكتب شعراً لمناحي النفيعي .. أعترف أني كثيراً ما ادخل متصفحاته حينما أكون بمفردي فقط !


.

[عايض الظفيري]

فواز بن عبدالله :
بعض الكتاب تحبهم من خلال قراءتك لهم .. ربما لأنهم يتجمّلون .. فواز بالعكس ..
ربما تكرهة وأنت تقرأه .. لكنّك حتماً لاتملك الاّ أن تحبة من مجرّد مقابلة واحدة ..


.

[عايض الظفيري]

.
مادمت ماتقدر على الجفن ، يـانوم
رح علّـم اللي للســّهر علّقونـي
.
اللي رموني من طرف رمشهم يوم
طشّوا بعيــني ملحهم ..وتركوني
.
رح قل لهم : من حط بجفوني رسوم ؟
على مقابر طيفهم في عيــــوني !
.
يْصْدق علي ، ان قيل معطى ومحروم
معطى ، ومن بعد العطيّـة ، خذوني



.

[عايض الظفيري]

.


وين ابنساك وانت الغايب اللي قعد = وسط روحي يقاسمها المسا والصباح
انت يامن تركت فوسط روحي بلد = كل مافي شوارعها لذكراك صـــاح
طالبك صدق، رجع لي هذاك الولد = خابره من توادعنا تركني وراااااح

[عايض الظفيري]

طفل ، والعيد يشبه بالفرح طفلة = لاهيـة في شغبها وين وداني
من شغبها تصير خدودها حفلة = تنثر المــلح والسكر على شاني
وين ماتتجه والعيد يهتف له = من فرحها تعيش العيد من ثـاني
خابرٍ قلبي اللي غـاب واقف له = ويتحرا.. وطعم العيد بلساني
لو تعيّد على قلبي على غفلة = يرجع الطفل ويعيّــد مع اخواني
خابر رموشها لاناظرت جفلة = تفتكرني واذا ناظرت تنساني

[عايض الظفيري]

شافك العيد مايمدي تغطّين = كان جنبي ، وقف متنه بمتني
قال ابسرق فرحها للمساكين = قلت لا ، انتظر لاعايدتني
غرّتك كنها ضحكة نهارين = من غياب الفرح جت طيّرتني
جبتي العيد ..لا والله عيدين = هو بقى عيد اصلاً ماعطتني ؟
مابقى في حساب العيد بعدين = طش هذا الفرح من يوم جتني
هي هدية سما تبرق من سنين = دوب طشّت مطرها واغرقتني
طفلةٍ تقسم احساسي لنصفين = بين احلّ الحرام وبين فتني !!

[عايض الظفيري]

.
.
شايفه كيف البحر يصبح حزين = لاوقف عاشق ولوّح في يديه
شايفه وشلون يبدا يستكين = كل مايقرا تفاصيل الوجيه
البحر : يشبه وطن ، للمتعبين = يتسع صدره لمن ضاقت عليه
يسبر الروح ويهدهدها ، وتزين = وكل همٍ فاض في الصدر يحكيه
يشعر بنبضات كل العاشقين = وكل زفرة هم فــ أمواجه تتيه
شوفي كيف الناس فـ أحضانه تلين = ترمي الدنيا ورا الظهر وتجيه
هذا انا لاصرت في حالي سجين = انعتقت وجيت يمّه مبتليه
آه ياريحانة القلب ، اشتبين = عندك البحر يعرفني واسأليه
كل ماقلتي تجين وماتجين = أشعر أمواجه تكون اشبه بـ ( ليه ) ؟
عاد انا دمعي مثل ماتعرفين = وانتي أكثر من مسح دمع فـ يديه
يعني لو غبتي بيذبحني الحنين = وافقدك فقد اليتيم لوالديه
كل موعد ينهجر يعني : سنين = احبس ايامي عشانك واحتريه !
والكلاام اللي تحبسينه ثمين = المح عيونك ترجاك : اطلقيه !
سولفي للبَحْر يبغاك تحكين = سكّرك حتى الشواطي تشتهيه !



.

[عايض الظفيري]

.

فمان الله .. يامن تحْسب اني من غيابك طبت
= وانا ، كل السهر بعيون خلق الله تمخلابي
ترتلّك عيوني كل آيات السهر من غبت
=كأنّك من رحلت .. معلّق الذكرى فـ أهدابي
انا .. شمّاعة الحزن العتيق ، اللي طواه الكبت
=تمر النّاس حزني .. واتّفيا تحت اعصابي
حزين الروح .. لكني على حزني ، كثير أطربت
=كأن الناي ، بث بخافقي سرّه وغنّابي
قسم بالله .. لانامت عيون العالمين وجبت
=حنينِ لك تركته فـ آخر آخر روح يحيابي
كأن الشوق يصرخ : يامعذبني ، تراني تبت
=جَلَدْه من الحنين اللي تركته يـ أول احبابي
انا بعدك صحاري ، خانها ريح المطر وأجدبت
=أدور بي فرح لعيون من يفرح .. ولا القابي





.

[عايض الظفيري]

هجيني طويل جداً جداً :

.
.
البــــارحة والكلام أخـــــــضر
والوقت من [ أكثره ] مرتاح
.
دقـــايقه أصبـــحت أصــــــــغر
وأقصر من [ ارماشة ] الذبّاح
.
تشــجّر الليــــــــــل لين أزهـر
جيتي .. وعطر انتظاري فاح
.
فـــــــرّت ثــــوانيه مــاتــــقدر=
تستجدي الصبـــح والمصباح
.
الثــــانية طعمــــــــها ســــــكّر =
والثــــــــانية طعمها تفــــــاح
.
عيــنك تبـــــــوح بكلام أكثـــر=
والصمت يجــمع كلام طـــاح
.
والوقت كـ[ الســـيف ] مايشهر =
الا وتـنـْـسَل معــــه ارواح !
.
الليل هذا صديق اقشر...=
من يوم شافك تركني .. راح !
.
أشره على الصبح لابكّر=
وازعل على الليل كيف انزاح !
.
وانا رجل بينهم يسهر ...=
غير السهر مامعاي سلاح !






.

[عايض الظفيري]

http://www14.0zz0.com/2010/01/05/09/417308849.jpg


.
أجمل الشعر شعر انسان لإنسان=
وأعظم الشعر .. شعرٍ مانطوله !
نشعره .. مثل فرحتنا بسلطان =
يوم غنّا الوطن عرضه وطوله
::
وأجمل الحب والأعياد : الأوطان=
وأعظم الناس وأكثرها بطولة
صدر دولة .. فتح صدره على شان =
تصبح صدور شعبه : صدر دولة !
::
من ملك في قلوب الناس عنوان =
وحّد قلوبهم لحظة دعوا له
كلهم قلب واحد ، ذكر ولسان=
منكسر بالدعاء .. يرجي قبوله
::
رافقوه بمحبّة وين ماكان=
واتّساءل .. ولهفتها عجولة
تكتبه مثل : سيرة وبل هتّان=
والفرح يبتهج بأجمل فصولة
::
ماحصل غير كل الحب عنوان =
فيه اصعب من الكل وحصوله ؟
مابقى للقصايد سرج وعنان =
والمشاعر مثل مهرة جفولة
::
صدق ماللكلام قفول بيبان =
لكن الشعر من يقدر يقولة ؟
ابلغ من القصيد وكل الأوزان=
صاغها مشهده لحظة وصوله
::
واقف بين عبدالله وسلمان =
يشعر بكل نبض يرف حوله
شاعريّة خيال بروح فنّان=
أظهرت كل معنى للرجولة
انحنى بين كفينٍ لها شان =
وارتفع قدره اكثر في نزوله !
::
كانوا ملوك .. لكن كانوا اخوان=
أصعب الصعب وأقدر من ينوله
آلفوا بينها عن حب وايمان=
مثل ما آلفوا طعب وسهوله !


.

[عايض الظفيري]

..



باللقاء ، بالوداع .. الأمر سيان = ماخسرتك ، وانا .. رابحك رابحك
بس رمشك تهدّد قال : يافلان = لو يطول المدى.. ذابحك ذابحك



.

[عايض الظفيري]

..

( اعلل النفس بالآمال ) .. وعيونك
لولا عيونك .. ( يضيق العيش ) بعيوني


..

[عايض الظفيري]

.

مجرّد اذكرك مايبقى ولا طير ...
الاّ ورفرف جناحه في خيالي

من وين شعر الحمامه والعصافير ...
لجل اكتبه مثل ما اشعربك قبالي

وإنتي مثل فكرة بيضا ولا اتطير ...
الاّ تحرّك شجر وغصون بالي

احساسك اجمل من افكاري وبكثير ...
وأجمل من احساس قمرا فالليالي

وجهك من ادناه يآخذ باول الخير ...
ويعلمه كيف يصبح خير تالي

وجهك قصيدة فرح واحساسها غير ...
مامرّت الا بذهن احساس عالي




.

[عايض الظفيري]

..




شكراً عليك ..
والف شكراً للأهداب ...
والفين ( عفواً ) بين ظنــّك وبيني

ماقلت لك :
يامعاتبتني بلا عتاب ...
انك اعزّ اللي عطتني سنيني .!

لو مافهمتيني وانا :
شعر وكتاب ...
مفتوح قدامك .. متى تفهميني .؟

يا معلمتني كيف الأقمار تنساب ...
بين الضلوع ، ، وبين صافي حنيني

لو تعرفين اشلون المّك من غياااب ...
ان كان ظليتي عمر .. تحتريني

يمكن هجرت احباب
واشتقت لأحباب ...
لكنّك اكثر منّهم .. صدقيني

فعلاً نسيتك ..
بس ماهو ورا الباب ...
انا نسيتك بين جفني وعيني

شكّي بصدقي لو بغيتي بلا اسباب ...
شكّك يزوّدني يقين بيقيني



.

[عايض الظفيري]

صوت : عايض الظفيري


الله يرضى على قلبي ويكسب رضــاك
والله يرضى على رمشك .. ويرضى علي

هذا انت يامجمّل ايــام الفرح من غلاك
هوّنتــها بين رضواني وبيــن زعلي

غنيت لك من اغاني الشوق ( قلبي معاك )
لكن عيــونك تـغني لي على ( يرد لي )



صدى : لمحمد السعيد

ياعايض الشعر عيّشني ســوالف هواك
مابين حـــدّين .. ذا علمي وذاك جهلي

لا الله كتب لي مثل غيّــك ولا الله هداك
ترجع مثل ما انت .. رايق لي وقلبك خلي

اعطيت للعشق فرصة عمر .. يبحث خفاك
وعرّضت قلبـك بــلاوي الحب حتى بلي

مقرن حجاجه لك الله .. مارماك اذ رماك
الاّ بـعد .. ماتـركت امرك بليّــا ولي



صوت : عايض الظفيري

في ( مذهب الحب ) تسمع من يردد معاك
( مدد ) وهو من جحيم الـحب يغلي غلي

وفي ( مذهب الشعر ) تلقى من يردد وراك
ياليــل الأشواق ليّلت .. ومتى تنجلي .؟

وانا ( تصوّفت ) فالثنتين .. شـفني هناااااك
في ( مذهب العشق ) .. لا شيعي ولا حنبلي





Rose7747

[عايض الظفيري]

.



يا اللي غيابك من حضورك خطفني
مارحت لكن : بيض الأيام راحن


وجهك على كل الأوادم صدفني
والذكريات فشارع القلب صاحن

والذكريات ليا فنت .. وين تفني ؟
على غديرك ربّعن واستراحن

تعال يا سكّر حكاياي شفني
تعال يا مبهّر حناياي فاحن

والدمعتين اللي تململ بجفني
البارحه مع سجدة الليل طاحن .!





.

[عايض الظفيري]

:: :: ::



ليت حزني مثل حـــزنك واعدّيه
ليت دمعي مثــل دمعك سـحابة

ليـه حزني كذا ؟ .. الله يهديـة
وين ماروح .. لي حزن يتشـابه

اقربـي ( يـابعد حزني ) وطاريه
فلّي الســـالفة شوق وصبابه

مالقى الليــل بـعدك من يغنيه
سامريّــة ولا جرّة ربــابة

لا غناء الساحل الشرقي يسليه
ولا دلع ( ميجنا ) ولاّ ( عتابه )

كان للشعر في قربــك قوافيه
كان له صدر واحساس ورحابة

شاغبك لين ، بيّـحتي معانيه
عاش بك لذّة الطيش و شبابه

انولد يــوم : ماكنتي تحبيـه
وانقتل يوم : شرّعتي غيــابه

صار عجزه مثل عجزي وادرايه
مثل حيـرة سؤال ، بلا اجابة .!

تذبحينه ، ورب الشعر يحييـه
ارفقي فيـه .. لايفقد صوابـه

هاك قلبي _ فمان الله _ واقريه
واتـركيني لـحزني والكتــابه



:: :: ::

[عايض الظفيري]

جداريّة


وش اخبارك ؟
وش اخبار القمر جارك ؟
وش اخبار الكلام اللي هرب مني ..
بقى من ضمن أسرارك ؟
امانة علقيني في سماك ونقشة اسوارك ..
مثل ضي تلعثم وانطفى نورة مع انوارك

***

احبك
مثل ماحبيتي اول واجمل اشعارك
احبك
مثل ماحبيتي اول والطف اعذارك
احبك
مثل ماحبيتي اجمل واسعد اقدارك

***
امانة يا الحنين اللي ملى صدري .. تشكّل طير
وعلّمها ( اش كثر ) تعني : صباح الخير ..
وكيف الصبح
لا مرّ الصباح ولا سمع منها :
صباح الخير
وعلّمها .. تخبّي سكّرة روحي
حكاياي وبعض بوحي ..
واغانينا لنوال و( قلبي السّاهي )
وحرف ( الراء )
ذاك اللي بجمع الزعفران
اعن الحكي لاهي

***

ليه
اذا صار الحكي منّك يصير اعذب ؟
وليه ..
مجرّد م اسمعك تحكين
اعرف ان الحكي يطرب
من لحّن كلام النّاس بلسانك ؟
من خلى الكلام .. ابيض جميل
اذا قلتيه يشبه لحظة احسانك
من خلّى الكلام طيور
ترفّ ..
وماتحط الاّ على اغصانك

***
انا ..
انا ..
انا وش كنت ؟
من خلاني اجمل ( انت )
في اجمل شفايف ( بنت )

***

يا الله ...
وش كثر كان الحكي بلسانها مخلوق من سكّر
تحس الأبجديات القديمة بابها سكّر
تحس النّاس تتكلّم كلام اموات .. لا أكثر ..!

***

يا الله
وش كان السهر من قبلها ..
مجرّد ليل عابر
واغنيات بدون روح ..
وشويّة حكي اصفر .!
اجل بالله من يسهر ؟

***

احبك ..
توها بس الحياة اتوسّدت يدي
وقالت ياولد
تقدر
تقدر


.

[عايض الظفيري]

::

لا تعاتب جفاي .. وتحســب اني زعلت
كيف ابزعل وانا من رمش عينك قتيــل

كان لك ثـار عندي .. هذا انـا وانقتـلت
( حسبي الله على رمشـك ونعم الوكيل )

دام رمشك غديـر المـوت مهما عدلـت
اعدل الظلم من يـذبـح بطرفٍ كحيــل

سـاحر الرمش .. وش باقي بـعد مافعلت
تعتـقد كل ماتـفعل بـقلبـي قلـيــل ؟!

هذا انـا من لمحتـك .. واقـفٍ مارحـلت
صابرٍ مثـل صبر اليــاس للمسـتحـيل

قاتـل الله جـهلك .. كان فينــي جهـلت
وعظم الله صبري كان هــجرك طويــل




.

[عايض الظفيري]

محاولة فاشلة

طحت .. عمر الجبل .. ماطاح متواسي
لكن الله يجيب لضيقتي مرسى
*
كنت ابنسى ،، واظنّي قلت لك ناسي
احسب الجرح مثلك : ( يكبر وينسى )
*
لكن الجرح يانوّارة احساسي
صار انسان مثلك .. يكبر ويقسى .!

[عايض الظفيري]

بندول وحشة

كانت الساعة من الوحشه زمان
كانت الوحشه مع الساعه سبع

كان حتى الليل مهزوز وجبان
والملل يقتاتني حتى شبع

كنت اشوف لعقرب الساعه لسان
يهزأ بشاعر وحيد ، ومو ( تبع )

يا ( اماني ) كنت محتاجك أمان
كنت محتاجك لصحرانا نبع

ليلتك تعطي الأغاني ليل دان
وطلتك والفجر جيران وربع

ضحكتك جنّه ودمعاتك جنان
ماخذه من اصغر اطباعك طبع

يا ( اماني ) تكّة الساعه زمااان
وكانت الدنيا ممات الاّ ربع


.