إحساس يــ غ ــمر الأنفـاس [الأرشيف]

رزان العتيبي

01-29-2009, 08:45 PM

كنت أذاكر ..
عن يميني دفتر أخضر ..
وعن يساري ..
جرح كافر ..

كنت أذاكر ..
ومرت الذكرى سنيني ..
وإقتطع قلبي ..
تذاكر ..

كانت السكّة حكايا ..
لونها أسود رمادي ..
وهالقطارات الحزينة ..
كانت تصفّر أغاني ..

أمس قلبة هو مكاني ..
وداخل عيونة أطير ..
منهو من قلبة خذاني ..
وصرت من بعده أحير ..

كنت أذاكر ..
وفي زوايا البيت جاني ...
تذكري أوّل لقانا ..
كنتي أوّل من يهاجر ..
يترك إحساسي حزين ..
يبتعد عنّي ويسافر ..

كنت أضمك وسط عيني ..
وان بغيت ارمش أخاف ..
تهربي منّي هناك ..
وماأقدر أرجع من جديد ..
أحضن عيونك وأنام ..

كنتي .. وكنتي .. وكنتي ..
هدّني والله بكلامة ..
وقلتلة بروحٍ حزينة ..
كان هذا فعل ماضي ..
إنكسر وأصبح سراب ..
ليش جاي تعيد لحظة ..
(ا)قتلت فيني أماني ..

انا والله كنت أذاكر ..
عن يميني دفتر أخضر ..
وعن يساري ..
جرح كافر ..

إنت وش جابك معاهم ..
ماتعَرْف إني أكابر ..!

http://www.5aledyat.com/vb/uploaded/8394_01209681945.gif

رزان العتيبي

01-29-2009, 08:46 PM

http://www.alhayrh.com/galry/albums/userpics/normal_le3ba.jpg

يآآآهـ يمّه ..
كنت ألعب فـ الحديقة ..
مثل دايم ..
مرة أتمرجح بخفّة ..
ومرة أشم الورود ..
فجأة يمّه دون مَ أدري ..
زارني طيفة بلهفة ..
جاني من خلفي ينادي ..
" طفلتي .. ياقطعة منّي .. كل شئ عنّك وحشني ..
طفلتي .. والله فقدتك .. وجيت أروي بي حنينك "
يمّه أربكني بكلامة ..
مدري هو فعلاً لفاني ..
والا أتخيّل حروفه ..
مابغيت أصدّ يمه ..
مابغيت أًصدم شعوري ..
إنة مو واقع / خيال ..
رجفة هزّت لي كياني ..
يوم حط ايده فـ ايدي ..
انتشر فيني دفاه ..
وصحت ياعالم حقيقة ..
" طفلتي .. وشلون روحك .. هي على خبري بريئة ..
والا دنّسها تلوّث .. وأصبحت موضة قديمة "
لاتحاتي ..
مَ تغير فيني شئ ..
إلا أحزاني بغيابك ..
فارقت سنّ الطفولة ..
وأصبحت فيني كبيرة ..
حتى لاحظ هالحديقة ..
في زوياها زرعنا ..
وردة وقصّة جميلة ..
شوفها هالحين شاخت ..
واكتساها لون أبيض ..
معلنٍ إنها بتموت ..
" طفلتي .. طيب تعالي .. ضمي أحزاني بنموت "
إي نعم أحسن نموت ..

http://www.5aledyat.com/vb/uploaded/8394_01209681945.gif

رزان العتيبي

01-29-2009, 08:49 PM

رحت أدوّر عن دفاي ..
وسكة دروبي وجيتك ..
مادريت إلا وأنا اللي ..
في يدينك أسترحت ..
ضامني هالبرد بعدك ..
كسّر أسوار المدينة ..
لين ضاقت في يديني ..
وأبتدى قلبي ينادي ..

" يمّه برد الكون كلّه
.... نخّر عظامي ب آنينه
يمّه قلبي وش محلّه
.... في متاهاته وسنينه "

يمّه هذا البرد مؤلم ..
مثل طعناتة بروحي ..
بس رغم اللي أحسّه ..
أعشقه موت وأحبّه ..
ورحت احطب له حياتي ..
وأشعل بقلبة الحنين ..
ماتوقعتة أناني ..
لما جيتة .. راح وين !

http://www.5aledyat.com/vb/uploaded/8394_01209681945.gif

رزان العتيبي

01-29-2009, 08:53 PM

غاب وترك لي من بقاياه سلسال
ـــــ لا هزّني طاريه رحت وحضنته

http://www.5aledyat.com/vb/uploaded/8394_01209681945.gif

رزان العتيبي

02-01-2009, 08:04 PM

دفتري/ممكن أبحكي عن تفاصيلي بدونه
ـــ ودّي أشرحلك حياتي من بعد م اقفى وراح
يلّتحفني برد أقسى مِنْه ومن قمّة جنونه
ـــ كسّر ضلوعي بضمّه لين كلّي فيه طاح
كنت أذاكر لإختباري وأصبح كتابي عيونه
ـــ مدري والله كيف أبنجح وإختباري/هالصباح

http://www.5aledyat.com/vb/uploaded/8394_01209681945.gif

رزان العتيبي

02-03-2009, 01:03 AM

صح أبيك/ولكن الدنيا تجارب
ــــ علمتني من تحبه..لاتجيه وترتجيه !

http://www.5aledyat.com/vb/uploaded/8394_01209681945.gif

رزان العتيبي

02-03-2009, 01:05 AM

على فكره ..
يقولوا إنك قدرت تعيش من دوني !
صحيح تعيش من دوني ..

http://www.5aledyat.com/vb/uploaded/8394_01209681945.gif

رزان العتيبي

02-03-2009, 01:21 AM

يمّه صرت في العشرين !
كبيرة حيل ماتدرين ..

خلاص اليوم يايمّه ...
أبجلس في مجالسهم ..
وأبي أسمع حكاويهم ..
وأبي أضحك أنا معهم ..
وأبتكلم أنا فيهم ..

يمّه صرت في العشرين !
كبيرة حيل ماتدرين ..

نعم يمّه أنا بنتك ..
هذيك الطفله في حجرك ..
كبرت وكبرت أحلامي ..
وضعت بدوشة أيامي ..

يايمّه صرت في العشرين !
كبيرة حيل ماتدرين ..

أبشقى أدري يايمّه ..
وهمّي في الخفا بيكبر ..
ولكن ببقى يايمّه ..
هذيك الطفله ماتكبر ..

ويايمّه صرت في العشرين !
كبيرة حيل ماتدرين ..

http://www.5aledyat.com/vb/uploaded/8394_01209681945.gif

رزان العتيبي

02-07-2009, 03:39 PM

سحايب هالحزن مرّت ..
على ضلوعي ..
مطرها بلل أشواقي ..
وصحت اليوم أحتاجك ..

أنا بالحيل أحتاجك ..
أنا بالحيل أشتاقك ..

أنا ملّيت ألملمها ..
جروحي والله ب/غيابك !

أنا ياما تعبت وجيت ..
لحد بيتك ولا/ردّيت ..

ولاردّيت لي صوتي ..
ولابعثرت لي سكوتي ..

http://s111t.com/vb/downloads//14_fhm.gif

رزان العتيبي

02-07-2009, 03:40 PM

أنادي والصدى يرجع محال تعود لأيامك !
ـــ خلاص اليوم إنسيها وعّزيني وأعزّيها !

خلاص اليوم إنسيها :(

http://s111t.com/vb/downloads//14_fhm.gif

رزان العتيبي

02-09-2009, 02:01 PM

الصّباح اليوم .. مخنوق وحزين ..
ـــ كيف يتبسّم .. وهو فاقد شفاك ..!

كيف أضحك .. والدّمع لجلك سجين ..
ـــ مايبي ينزل .. ويجرحني بلاك ..!

http://s111t.com/vb/downloads//14_fhm.gif

رزان العتيبي

02-09-2009, 02:09 PM

نزل دمعي على خدّي نزل بللّي ثيابي
ـــ نزل وإنت بعد واقف بنص العين تتفرج

حسبته ياخذك منّي يخفف عنّي أتعابي
ـــ وأثاري موقفك ثابت أبد مالك أمل تخرج

http://s111t.com/vb/downloads//14_fhm.gif

رزان العتيبي

02-09-2009, 05:05 PM

جيت أهنّيبك أنا العام الجديد
....... ماأهني حضرتك في كلّ عام

ل/أنه هو اللي كسب شخصٍ يزيد
....... كل عامٍ يدخله حب وسلام

http://s111t.com/vb/downloads//14_fhm.gif

رزان العتيبي

02-14-2009, 02:38 AM

وصرنا بعاد ..
على سكّة منافي الخوف نتمشّى ..
تحركنا رياح الشوق ..
ولا نسمح لها تبقى ..

نظل بعاد ..
تحضنا أمانينا ..
بقايا ريحة الأحباب ..
ونبكي حيل ذكرانا ..
ونصرخ ليش ملّينا ..!
ليه البعد يملكنا ..!
وياخذنا لحد بيتة ..
ويرمينا ..

وماتت كل أفراحي ..
وساد الحزن أجوائي ..
وصرت أصرخ بعالي الصوت ..
ياهذا الموت ..
تعال أقبل .. وعش فيني ..
وخذني عنّي لديارك ..
ياهذا الموت ..
أنصفني .. وخلني فيك أتنامى
مثل غصنٍ لقى تربه عليها يعيش ..

وأنا أسأل علامه راح ..!
ملا هالخوف بستاني ..
وقطفت من الثمر أتراح ..
ياسكّة حزني الأول .. وغيبة فرحي بروحك ..
متى هذا الطريق يغيب .. والقى حلمي الضايع ..

ولا أسمع سوى صوتي .. صداي أصبح مثل موتي ..
يحاول يضوي ايامي .. ويظلم هالطريق أكثر ..

وشفنا بعاد ..
ومترامين ..
على أطراف الشفاه اليوم رحلتنا ..
يـ أما هالعمر يصدق بقصتنا ويجمعنا ..
يـ أما هالعمر يخذل أمانينا وينهينا ..
ونبقى بعاد ..

http://s111t.com/vb/downloads//14_fhm.gif

رزان العتيبي

02-17-2009, 04:30 AM

إختنق صوتي وخانتني الدموع
ــــ قمت أهدّي داخل ضلوعي جياع

قلبي اللي كان في وقتك قنوع
ــــ وصدرٍ أجوف عايشٍ بعدك صراع

كنت في حبّك أماري هالجموع
ــــ عن رضى غيرك صدر منّي إمتناع

ماضوى إحساسي لجل غيرك شموع
ــــ ذاب في نبضك سكن فيه إلتياع

http://s111t.com/vb/downloads//14_fhm.gif

رزان العتيبي

02-17-2009, 04:31 AM

ياحروفي ..
وإن حصل منّي خطا ..!
خبّري المحبوب ..
مو قصدّي سهيت ..

ياحروفي ..
والله تعبني البطا ..!
كلّ ماطالعت ..
أشباهه بكيت ..

http://s111t.com/vb/downloads//14_fhm.gif

رزان العتيبي

02-22-2009, 02:41 AM

أدوّرني | ولا ألقى .. أثر يكشف مكاني وين ..!
ــــ أدوّرني | وأثاريني .. وطن مجفي من أحبابه

مَ غير الهم يرسمني حكايا ترفض التّلوين
ــــ سِوى بلون السواد اللي جروحة سبّة أتعابه

من نص جديد :)
http://s111t.com/vb/downloads//14_fhm.gif

رزان العتيبي

03-02-2009, 01:42 AM

غلطت أدري أنا بحقك وأنا ياصاحبي ندمان
ـــ عرفت المرّ في بُعدك وخانت دنيتي ناسي

ندهتك يوم أنا ميّت ولكن ردّت الأكفان
ـــ خسرته إيه وش يعني ياأنت وش كثر قاسي

وفجأة بين هالعالم أشوفك وأذكرك أزمان
ـــ ياهذا الوقت عذبني وجيتك كاسرٍ كاسي

أنا أسف على نفسي أنا أسف على الخذلان
ـــ أعرفة قلبك الطيّب بيسمح لاعرف ياسي

http://s111t.com/vb/downloads//14_fhm.gif

رزان العتيبي

03-03-2009, 12:48 AM

الرّياض اليوم يامكّبر حِزنها
ـــ ماقوت فرقاك صاحت لك تبيك

ملّت غيابك وجرّحها زمنها
ـــ هلّت الدّمعة تنادي راحتيك

http://s111t.com/vb/downloads//14_fhm.gif

رزان العتيبي

03-04-2009, 03:51 PM

يقول إنسي وأنا بنسى .. يكون أحسن نكون أغراب ..
ــــ بخلّي هالقلب يقسى .. طلبتك يالغلا إنسيني ..

أنا مقدر أكون إنّي هذاك العاشق الكذاب
ــــ ولا أظني أنا قلبك بيتحمّل جفى/سنيني

http://s111t.com/vb/downloads//14_fhm.gif

رزان العتيبي

03-05-2009, 12:38 AM

في ذيك الزاوية مركاي ..
غريبة بينهم بالحيل ..
وأقرب للقرب منهم هي |أحداقي ..
أناظرهم بدون شعور ..
وأضحك لاعزفوا منفاي ..
أحاكيهم .. يحاكوني ..
قرابة .. بس حيل بعاد ..
سوالفنا .. صداها صمت ..
نواظرنا .. سؤالٍ مات ..
قبل لاينفرط عقده .. ويلقى الحلّ ..
أمانينا .. نظلّ نفرح ..
ولكن للحسد مطرح .. ب/أغاني الشوق ..
نعم عادي ..
بسّ الوضع جداً زاد ..
ينادوني .. أناديهم ..
على رفّ الحزن كِنّا ..
نفصّل للهنا مِنّا ثياب جداد ..
نبي نضحك بهذا العيد ..
أوّ الصدق اللي إختفى مِنّا ..
أبي أضحك ...
أبي أشعر أنا وين الأماني تزيد .. !
ياجرّحي ماكفاك من القهر إنّك ..
" بغيت تطيح من طولك وتنهيني على شرفة منافيهم "
ياهذا الخوف ...
أنا ودّي أناديهم .. وأبسأل ليه خلّوني ..
أناظر طيفهم يرحلّ .. ولا أقدّر أردّ الباب .. !
ويجمعنا حنينٍ صار يبكينا ..
مابين المدفأة والباب ..
وذيك الزاوية تشهد ..
على كلّ الذي يحكون ..
عن الفرقى وكيف إن الذي يسهى ..
أكيد إنّه صبر مجحود ...
أبد ماكنت أسمعهم ...
قرايب بس حيل بعاد ..
من أوّل ماطروا الفراق ..
سهيت بعالمي وحدّي ..
وكيف اليوم صِرنا بعاد ..
بذيك الزاوية مركاي .. !
وطيفك حاضرٍ غايب ..
مابين المدفأة والباب ..

http://s111t.com/vb/downloads//14_fhm.gif

رزان العتيبي

03-07-2009, 10:42 PM

براويز الصور ملّت تزيّف واقع الأوهام
ـــ تداري وسطها كذبٍ تعب هذا الخشب يحويه

http://s111t.com/vb/downloads//14_fhm.gif

رزان العتيبي

03-12-2009, 09:10 PM

يبه شفني .. على كفّ الغيوم أنقش تفاصيلي
ـــ حكايات الكِبر .. بيت العمر .. معزوفة أحلامي

أغاني شوق .. تنهيدة شقاي .. وفلسفة ليلي
ـــ طريق الّتيه .. نبضات القصيد .. ومُعْجَم أوهامي

تسللت الأمل ظميا .. أبروى من تعاليلي
ـــ وأثاري هالظّما أفضل .. من إنّي أشرب أيامي

بنيت الحلم من تربة خفوقي .. وإنهدم حيلي
ـــ سرقت الخوف من محجر عيوني .. ضاق هندامي

أرتّب مكتبة عمري .. وتَنْفضها مناديلي
ـــ يطير غبار يخنقني .. ينخّر [ حزنة ] عظامي

http://s111t.com/vb/downloads//14_fhm.gif

رزان العتيبي

03-17-2009, 08:43 PM

http://www.rofof.com/img2/3wqbiy17.jpg

هجرت أنا أشياء بعدك كثيرة ..
من ضمنها كانت تفاصيل [ جرحك ] !
من ضمنها كانت تفاصيل [ جرحك ] !
من ضمنها كانت تفاصيل [ جرحك ] !

حلمي .. أمانك .. ضحكتينك .. عبيرك
ـــ فرحة خفوقي .. ل/أهتنى بقرب قلبك
ماسنجري .. وإحساس عذبٍ يثيرك
ـــ ينشر ربيع أحلام .. لامرّ دربك

وخان الدرب أقدامي ..
وصحت الآه في صمتي ..
نعم " محتاجتك " جنبي ..
وودّي بجد أشكيلك ..

أنا بعدك قضيت الليل
ـــ تنهيدة حزن .. وجروح
أنا بعدك فقدت الحيل
ـــ ولا باقي بي أية روح

وكنت أسأل عن أحوالك !
باقي موجز أخبارك !
وإلى من قالوا إنْك بخير ..
تطمن قلبي المخذول ..

مع إنّي من طريت البُعد ..
وقلت اليوم إنسيني ..
هجرت اشياء لك عنّدي ..
وأولها تفاصيلك ..

وأولها تفاصيلك
وأولها تفاصيلك
وأولها تفاصيلك

http://s111t.com/vb/downloads//14_fhm.gif

رزان العتيبي

03-25-2009, 07:22 PM

{ مدخل

وإن خنقني الصوت شيفيد الكلام ..!

ضحكت وماتت شفاهي ولا باقي بقلبي شـيّ
ــــ سوى حزنٍ رفض يظهر تغطّى داخل أحشائي

تورّق غصن أضلاعي توشحني طعون وأيّ
ــــ قطفني ثمرةٍ خجلى تلاشـت بعـده أسمائـي

مَطَرْنِي بلل جروحي وروّح ماعرف وش بيّ
ــــ تركني للعطش صنبور جفّ وسبّب إغمائـي

يغيب وأشعر بوحدة يبي يعرف مكانـه فِـيّ
ــــ ويرجع ممتلي آهات يلملمنـي عمـر نائـي

يصد إن قلت مااحبة وأنا دونه ملامح حـيّ
ــــ أضيق بدون إحساسه وجوده همسة إحيائـي

يرقّيني سحاب الفرح يَمْطرني سلاسل مـيّ
ــــ وأغرق في تفاصيلٍ مداهـا سِبّـة إعيائـي

عواصف مرّ تَسْكنّي تشتّتني سوالـف غـيّ
ــــ تزيد جروح مانامت فرحها لحظـة إبكائـي

تَلَحّفت الأمل كذبة سناهـا ماغشـاه الضـيّ
ــــ ظلامٍ حوّط أفراحي ضياعٍ لـمْ ضوّضائـي

وعصفور الحزن فيني يغرد يا مسـاء الفـيّ
ــــ يلمّ بصوته إحساسي يزيد طعـون أعدائـي

واهدهد له من جروحي أغاني بعضها مو لـيّ
ــــ ألفها بعثرة حزني وموتـي لاوصـل بائـي

كتبني ذا الزّمن طفله طواني في كتابة طـيّ
ــــ وبَعْثرني على رفّـه ورق ياكثـرها أخطائـي

وأرتّبني فرح ناقص يضيق الرفّ بي شويّ
ــــ يزحزحني إلين أطيح ويرفض لـمّ أجزائـي

وإلى جيت التئم وأروح ينادي ماكفاك الكـيّ
ــــ تعالي لمّي أحزانك و خوني بصمة إمضائي

كُتبت في 1/1/2009

مخرج }

ياحزن اش فيك ماتفهم
.... أنا ماقلت لك فارق !

http://s111t.com/vb/downloads//14_fhm.gif

رزان العتيبي

04-06-2009, 05:36 PM

وإن سألك الليل عنّي .. ليش جافيته ونمت !
ــــ قول من ليلة فراقي .. وإهيا تتجنب حضورك !

http://s111t.com/vb/downloads//14_fhm.gif

رزان العتيبي

04-18-2009, 04:09 PM

نايم .. يانظرة عينه اللي تطّلين ..
كلّ ماتقلّب .. قلتي والله صاحي ..

يحلم أنا أدري .. بس ودّي تنامين ..
يرتاح خيّي .. في رقادٍ صباحي ..

ياربّ .. خلّه .. وإحفظه لي من الشّين ..
يبقى لعيني نظرتي .. وهو سلاحي ..

" عسى ربي مايحرمني قربك ياخوي .. ويخليك لي ياقلب إختك "

إهداء أصغر من قدرك .. أدري ..
بس وربي حروفي صغيرة قدامك ..

الأبيات لأخوي الكبير .. وكلّ ناسي ..

http://s111t.com/vb/downloads//14_fhm.gif

رزان العتيبي

04-18-2009, 04:10 PM

http://www.friendsoflight.com/pp/data/502/Riyadh_Night_HDR.jpg

كنت أحاكي هال " رياض " ..
شلون هي حلوه بوجودك ..

وصارت تحاكيني إنها ..
موحشه زحمه بدونك ..

كل شئ فيها بكاك ..
صبحها سافر معاك ..

حتى هالـ " ليل " اللي فيها ..
تاه نبضه في خُطاك ..

والشوارع !
..... والمباني !
........ و الأحاديث القديمه !
كلّها تصرخ تبيك ..
نبضها صار بيديك ..

وجتني تسألني الـ " رياض "

صدق راح وماخذاني !
ـــ صدق مو ناوي يعود !
منهو بيعلّم زماني ..
ـــ إنه وحده لي وجود ..

وصارت تهذّري ال " رياض "

" أكسجيني .. من يجي يتنفسه !
ثاني اوكسيدي .. من اللي يجمعه !
صدري الدافي .. من اللي يسكنه !
دمعي الخاين .. من اللي بيمسحه ! "

وآه ياطول المسافة
ـــ بين أقدامه وترابي
خاطري أحضن أمانه
ـــ وأغفى في صدره ثواني

شفت وش صاب ال " رياض "
يوم أنفاسك جفتها ...

{مثلها بالضبط حالي
...............وهي أقلّ منّي بكثير }

http://s111t.com/vb/downloads//14_fhm.gif

رزان العتيبي

04-18-2009, 04:11 PM

http://www.alhayrh.com/galry/albums/userpics/bketni.jpg

كنت أحضن وصالك حلم
ــــ أغفى على صدره وأنام

صرت أسهرك جرح وألم
ــــ وأنثر تفاصيلي حُطام

http://s111t.com/vb/downloads//14_fhm.gif

رزان العتيبي

04-18-2009, 04:12 PM

أن تحتاجك ..
يعني أن تنظر داخلك ..
" فلا تجدك فيك "
لِ أنك بسهولة أصبحت معهم ..
حينما رحلوا !

http://s111t.com/vb/downloads//14_fhm.gif

رزان العتيبي

04-22-2009, 04:04 PM

ماعرفت أنطق من العبرات إلّا
ـــــ رحّ فمان الله والباقي أحبّك

http://s111t.com/vb/downloads//14_fhm.gif

رزان العتيبي

04-25-2009, 05:46 PM

http://www.rofof.com/img2/4pyvlb20.jpg

وترقى آهتك دخان ..
إلين تلامس عيون السماء ..
وتفيض دمعتها ..

ألم وأحزان ..
يعبّي فارغ اوراقي ..
وأحسّ الكلّ تاركها..

ويتشكل ..
أسى الخذلان في ذرّاتها | وتصيح ..

أمانه ياعرب ..
وين الأمان اللي وعدتوني ..!

أمانه ياعرب ..
وين التآخي .. ذِبلت عيوني ..!

وبدت تصرخ بدون شعور ..
خذتها تمتمات النور ..

أناديهم ...
ويرجع لي الصدى " ملّوا "

وأنااديهم ..
ويرجع لي الصدى " ذِبلوا "

وأناااديهم ..
ولا أسمع سوى صمتٍ .. تعب من كثر مَ تكلم ..
يرجي واحدٍ فيهم .. يفك القيد من يدّي
ويطلقني .. من أسوار التعب والآه ..
وأصير أمشي .. يديني تضمها ايديهم ..

شحب وجهي ..
وخط هذا الزمن في ملمحي .. تجعيدة الحرمان ..

مضت ستين .. وشابت كل أطرافي ..
من الضفة اللي في غربي .. إلين حدودي في شرقي ..

وسمعت أصوات هالأطفال ..
تنادي .. لي متى يعني !
يدين الظلم تذبحنا !
ولابه حد يسمعنا !
ولابه حد يسمعنا !
ولابه حد يسمعنا !
ولابه حد يسمعنا !

وتخنقني حكاويهم ..
في عَتم الليل ..
وأبكيهم ..

وأصاعد آهتي دخان ..
يلامس هالسماء يمكن ...
تحن قلوبهم ليّا .. وتحييني ..

http://s111t.com/vb/downloads//14_fhm.gif

رزان العتيبي

04-25-2009, 05:47 PM

قالها مُتعب من الصدمات يكْفِي
ــــ " روحي بدربك وأنا ببعد سنين "

قلت :: لحظة قبل لاترحل وتَقْفِي
ــــ قلّي شسوي إذا زاد الحنين

صدّ نظراته مسح الأثار يَخْفِي
ــــ دمعةٍ من طرف عينه لي تبين

قال :: وصّيتك على نفسك أبَكْفِي
ــــ قلبك الطاهر عن دروب الونين

راح وشموعي على فرقاه تَطْفِي
ــــ "ياعسى مع غيري الدنيا تزين ! "

http://s111t.com/vb/downloads//14_fhm.gif

رزان العتيبي

05-01-2009, 08:50 PM

على السّكّة نويت أفرش أنا عمري بقايا حلم
ــــ تعب من كثر مالملم حنينه في وسط دفتر

http://s111t.com/vb/downloads//14_fhm.gif

رزان العتيبي

05-02-2009, 03:08 PM

http://www.rofof.com/img2/4cdbgj26.jpg

مدّ كفّك وخذني .. إنتشلني إليك
ــــ ضمني لك بحضنك ودّي أرحل معاك

مرّت سنين عمري وإنتظاري يبيك
ــــ من تحاكوا [ يتيمه ] طاح دمعي هناك

أسمع أطفال غيري تندهك تحتريك
ــــ تركض بشوق يمّك تختفي في مداك

وأختبي في مكاني أنتظرها يديك
ــــ تحتضني مثلهم تبتسم لي شفاك

" طفلتي ليش دمعك بلل العمر فيك !
ــــ دام قلبي يحبّك خلّي حزنك وراك ! "

وأسرق الشوف منّك لين أضحك عليك
ــــ يومك تحس فيني " ياه م أحلى شقاك "

أصرخ بشوق " بابا " إنتظرني بجيك
ــــ حطّ كفّك بكفّي إحتياجي دفاك

كنت أحاكي طيوفك ب إمنياتٍ تبيك
ـــــ | اليتامى غلابا ليه ماارحل معاك !

http://s111t.com/vb/downloads//14_fhm.gif

رزان العتيبي

05-07-2009, 05:07 PM

من أوراقي القديمة :)

غفى جرحي وقلت أصحى يجوز المحَكْ واجي لك
ـــــ مدام الجرح بي نايم طلبتك قول وش جالك

سؤالٍ حيّر الضحكة بعيني شفني ابكي لك
ـــــ وأنا صعبٍ عليّ ابكي لغير اطياف ترحالك

تغَطْىَ الجرح بلحافك صرخ يافلان بشكي لك
ـــــ تعبت أزيّف افراحي أقول إن القهر هالك

تعبت ارقص على جروحي ولك طيري يغني لك
ـــــ يزيّف لك شعوري بك يموت بلحظة اهمالك

ياعمرٍ كان يعنيلي كثير أشياء وأعني لك
ـــــ علامك ترتحل عنّي بعد ماكنت لك حالك *

أنا اذكر كنت لك أسهر يسامرني عَتَمْ ليلك
ـــــ يحاكيني وش تسوي إلى من غبت عن بالك

تتوه بخَطْوتِكْ حاير تناديني وأنادي لك
ـــــ تَشَكّى غيبتي عنّك وانا أشكي بُعد منزالك

تقول اني نبض قلبك بدوني موتك ايشيلك
ـــــ واسَمّي يابعد نبضي عسى موتي قبل فالك

أبعرف ليش متغيّر تنفّضني مناديلك
ـــــ وأنا اللي فيك مَ أصدق كلام وزور عذالك

انا جيتك بعد مانام جرحٍ كان يضوي لك
ـــــ ابسأل بس وش ذنبي وانا اللي لابسه شالك

ألملم دمعتك وأضيق إلى من ضاق بك حيلك
ـــــ ويفرح بك غلا قلبي اذا هو مهتني بالك

تعال وشيلني منّي تَعبت امشيك وامشي لك
ـــــ تعال وهدهد أشواقي وخذني عَتّم ظلالك

ذبلت ومابقى فيني سوى همسات شوقي لك
ـــــ ابغفى دامها ملّت تنادي جيّة وصالك

* حالك = ذاتك ..

http://s111t.com/vb/downloads//14_fhm.gif

رزان العتيبي

05-09-2009, 03:06 PM

للأماني صوت ماظنّي يموت
ــــ وللدروب أشواق دايم له تحن

كيف أبنسى ! والمحاني له قنوت
ــــ خاشعة لصوته .. ومِنّه له تئن

يوم نادى " سارعي وين البيوت !
ــــ اللي تصدح بالأغاني .. ياوطن ! "

هاجرت لهناك بددها السكوت !
ــــ من غياب أصحابها صارت كفن !

صحت تَكْفَى .. منهو قال إنها تفوت
ــــ هالسنين بدون لا أبكي لك حزن !

آه ياأرضك / بسمتك / ذيك البشوت
ــــ ضيقتك .. لابللتني بك | مزن

كل شيءٍ مِنْك خيطته ب كوت
ــــ أحتمي به لا لفحتني هالمحن

ياوطن إسمع صراخي دون صوت
ــــ فدوتك روحي وحبك لي ثمن

http://s111t.com/vb/downloads//14_fhm.gif

رزان العتيبي

05-26-2009, 10:21 PM

أشعلت شمعه وطاحت في يدي دمعه
ـــــ العام يدّه هي اللي تشعل شموعي

ناديت وينك أشوف الناس مجتمعه
ـــــ ماهزّك الشّوق وإستاحشت لضلوعي !

سافر ولكن وعدني يرجع الجمعه
ـــــ قبل الأماني تزاحم عالي فروعي

سألت عنْه الأماكن كيف تستمعه !
ـــــ عازف لها الناي هو مشتت جموعي

خذني حنين / وأساور زايده لمعه
ـــــ ردني تعب من هبوبٍ تنزل دموعي

جعته أنا أنفاس ولافكرت في جمعه
ـــــ ماودّي أشبع وبعده أخسره جوعي

اليوم عيدي وكانت في يدي شمعه
ـــــ ذابت قبل لايثير الحزن موضوعي

http://s111t.com/vb/downloads//14_fhm.gif

رزان العتيبي

05-31-2009, 11:23 PM

في غيبتك شفْني أضيّعني معاي
ــــ عايش نعم لكن على [ فقْد الحياة ] !

http://s111t.com/vb/downloads//14_fhm.gif

رزان العتيبي

05-31-2009, 11:23 PM

تجي نذكر شقاوتنا ..
بيوت الطين .. ولعبة منهو يلحقنا ..
على شاطي هذاك البحر ..
تجي نتذكّر الماضي ..
وصوت أمي وهي تنادي ..
" شويّ شويّ .. وإنتبهوا ترى هذا البحر غدّار "

ونضحك يوم نسمعها ..
ولانهتم بأحد معنا ..
نبلل نفسنا بالميّ ..
ونرسم بالتراب أجمل ..
أسامي مرّت الدّنيا ..

تجي نذكر هذاك الحين ..
وننسى إنّا صرنا كبار ..
علينا الخطوة محسوبة ..
وأمانينا غدت تذّكار ..

تجي نصرخ ..
تجي نبكي ..
تجي نترك موانينا ..
ونرسى في بقايا الصّمت ..
وننسى حيل ماضينا ..
ولانذكر أغانينا ..
وصوت أمي .. وبيوت الطّين .. وشاطي ضمّ أسامينا ..

تجي نكره محبتنا ..
طفولتنا .. شقاوتنا .. ولعبة منهو يلحقنا ..

خلاص اليوم صرنا كبار ..
وكلّ كلمة بيحسبها الزمن ضدنا ..

تجي ننسف هذاك الـ كان ..
نعيش بواقع اللي صار ..
ونترك طيشنا مرمي ..
على شاطي محبتنا ..

http://s111t.com/vb/downloads//14_fhm.gif

رزان العتيبي

06-21-2009, 09:26 PM

أحاول أكتم أنفاسي أعدّي ضيقتي وأنام
ــــ أباعدهم عن عيوني يجون ف مُعظم أفكاري

أناديهم تعبت أقسى أجامل وأحترق أيّام
ــــ يطول الوقت وأتناسى من البايع من الشاري !

بحاجتهم أنا وأدري نسوني من قبل هالعام
ـــــ ضمايرهم قست باعت وتاهت فيهم أعذاري

نخيت الطّيب بعروقي يلاشيهم كما الأحلام
ـــــ عشان أعيش مرتاحه أنا مابي لهم طاري

تحمّلت الجفا منهم تعب هالقلب ماينلام
ـــــ طعم هالمُرّ في حلقه يذبّل كلّ أشجاري

صرخت بصوت متجرّح ياغيّابي كِفى أوهام
ـــــ كِفى هالصّبر حطّمني كسرني في وسط داري

قويت الهم لكنّ الغياب أقوى من الآلام
ــــــ ومن كثر القهر فيني كتبته حزن ب أشعاري

أشاكي الليل خلّوني أهذري والجروح اقْيام
ــــــ ملامحهم تناديني وأحسّ الشّوق بي عاري

يطلّ الصّبح أستنجد بقاياهم وأجرّ أقدام
ــــــ إلين أوصل مراسيهم أبيّح آخر أسراري

فقدت الفرح إحساس الأمان ومابقى أقلام
ــــــ أخط فيها تناهيدي طعوني طيحة أسواري

يهون الجرح لامرّوا بعيني وأنطق إستسلام
ـــــ تعالوا ضامني هالبُعد كفاية لعب ب أقداري

http://s111t.com/vb/downloads//14_fhm.gif

رزان العتيبي

06-23-2009, 03:55 AM

وعد يرجع !
ويهديني حنان الكون ..

وعد موجع !
ب انّي آخر أحباابه ..

ومن سافر !
حشى والله ماتدرون ..

ومن سافر !
ب انّي أحضن ثيابه ..

صدى صوته !
سكنّي مااعرف شلون ..

غدى موته !
حنينٍ ساكن اعْتابه ..

أنا طفله !
كبرت من العمر مليون ..

ألمح له !
ترانا حيل نتشابه ..

ونتشابه ب أمانينا ...
ب أغانينا .. ونظرة حزن تحوينا ..
بضحكتنا .. وأسامينا ..
بقولة [ مابقى دمعٍ يكفّينا ]

عرفت شلون نتشابه .. أو أكمّل !
لأني ماكتبت إلّا قليلٍ كان مالينا !

وأنادي لك ..
تعبت أسهر أنا وحدي ..
تعبت أبكي ..
وأغنّي لك ..

(
الأماكن .. اللي مرّيت إنت فيها
عايشة بروحي وأبيها .. بس لكن مالقيتك
)

مالقيتك ..
ساكنٍ هالصمت بيتك ..
من نويت إنك تسافر ..
إشتكى عندي وبكيتك ..

لا من قاله بكيتك ..
بس بكيت الوعد يوم إنك تقول ..
إيه راجع .. عدّدي بس الفصول ..
وراح تلقيني بجنبك ..
بس لكن ماوفيت ..
ماوفيت
ماوفيت

http://s111t.com/vb/downloads//14_fhm.gif

رزان العتيبي

06-29-2009, 05:17 AM

ياخطوة البُعد ضمّي آخر أنفاسي
ــــ يمكن ليا ضاق يتنفس ويذكرها

ياغفوة الحلم خطّي وسط كرّاسي
ــــ يمكن تفيق الأماني لحن وأسهرها

ياطعنة الآه لمّي نفسك بكاسي
ــــ يمكن الامس عميقك وأحضن أكبرها

من غاب عنّي جمعت بكفّي إحساسي
ــــ بعثرت حزني حكايا يجهل أكثرها

كلّ الزوايا تعاني من كثر ياسي
ــــ وأوراقي أسرار ماتت في دفاترها

ملّيت أحاكي أنا الجدران عن ناسي
ــــ وأسمع صداها آنينٍ طيّح اصْورها

سألت أنا الليل ليش بظلمته قاسي !
ــــ منهو خذا افراح ثغره ليه دمّرها !

جاوب وأحسّه حكاني وإنحنى راسي
ــــ سيّل دموعي وانا اللي كنت أقهرها

هذا النّص قريب منّي جدّاً ..
ممتنة لناديه المطيري لإنها قامت بمجاراة البيت الأول فية :)
http://s111t.com/vb/downloads//14_fhm.gif

رزان العتيبي

07-06-2009, 06:13 PM

الصّيف حرّ ..
وكلّ همٍ معاه { يطلّ !
ذكرى يوم ودعتك ..
وشارع بيتنا ,
............... والظلّ ,

وساعة حايط الغرفة ..
إلى من حان { موعدنا !
تحاكيني ,
يعني مُستحيل يعود !
يسلّي هـ الثواني بي ..
ويحكي لك ,
روايات العشق وشلون [ تشبه له ]
ويعزف لك ,
مواويل السهر و [ الشّوق ]

وتبكينا ,
ثواني كِنّا نسهرها ..
وشباكي ,
معاي يصيح ..
هِنا كنّتي { تغنّي له ,
"حسبت أشواقنا غابت "
ويهمس لك ,
مُحال تغيب !
ياكيف تغيب !
وهي أصلاً معاك تفوق ..
تشرق كلّ يوم بـ عيد ..

وأحسّ إنّي أنا { أشبه لك ,
صحيح بعيد ..
ولكن داخلي [ عايش ]
أنا أشعر بك ,
مع نبضي ,, وتنهيده ملت صدري ..

وهذا الصّيف ,
كلّ ما { طلّ !
شعل جمر إنتظاري لك !
وزاد الحرّ في جوّيّ ,

http://s111t.com/vb/downloads//14_fhm.gif

رزان العتيبي

07-09-2009, 03:55 AM

أعدّ أصابعي بعدك ..
وتطلع ماهي بـ/عشره ..
يـ الله ..
أكيد إني غلطت شوّي ..
وأردّ أعدّها ثاني ..
وتطلع بعد مو عشره ..
يووووه نسيت ..
هذا اليوم أوّل يوم بـ { غيابك ..
ونقص إصبع ..
الله يعينني بكره ..
بيرحل واحدٍ ثاني ..
وأردّ أعدّ ..
من أوّل ..
أحاتي كيف لوّ راحت ..
كلّ أصابعي وياك ..
يـ الله ..
يعني بترحل
[يديني ] !
وبَعَدْهَا أكيد
[ رجليني ] !
وبعد مدّه شهر شهرين ..
أكيد ألقاني بـ { جنبك ..
مدام إنها بدت ب إصبع ..
أكيد بتنتهي فيني ..

http://s111t.com/vb/downloads//14_fhm.gif

رزان العتيبي

08-14-2009, 11:36 PM

عيني كفاية رفّ الله يخلّيك
ــــ الغالي اللي راح ماظن يرجع !

http://s111t.com/vb/downloads//14_fhm.gif

رزان العتيبي

08-16-2009, 03:09 PM

ياشارعنا ,
متى نرجع !
ونتلاقى على أرصفتك ..
مثل أوّل ..
ولانخجل من التلويح ..
ومن قولة ..
[ عساك بخير يانبضي ! ]

ياشارعنا ,
تغيرنا .. نسينا شلون نتلاقى ..
بدون الخوف ..
نسينا .. كيف كان الضحك ..
يملى دوم جمعتنا ..

ياشارعنا ,
غدينا كبار .. صعب كل شئ يجمعنا ..
حتى ضيق أرصفتك ..
بكى من حين فُرقتنا ..

ياشارعنا ,
أبي أسأل .. إلى هالحين تنطرنا !
وذاك الكرسي الأخضر ..
إلى هالحين يذكرنا !

ياشارعنا ,
تعبت أذكرك في نومي ..
وفي صحوّي أشوفك دوم ..
وكلّ مرة أنا أمشي بك ..
أحسّ بشئ يخنقني ..
وينكرنا ..

http://s111t.com/vb/downloads//14_fhm.gif

رزان العتيبي

08-16-2009, 03:11 PM

متى انسى ..!
أعاند هالقلب وأقسى ..

أرحل في متاهاتي ,
وأضيّع كلّ آهاتي ..!

متى أرحل من أوهامي ..!
إلى { داري ,
وأحسّ إني ملك نفسي ..
ولابه شخص ياخذني .. وينساني !

متى بسكت عن أسئلتي !
وأحفظ كلّ { أجوبتي ,
وأقول إن العمر لحظة ..
تمرّ وتحضن أفكاري ..
و
[ تقراني ] !

وتنفيني إلى سكة ..
نهايتها ,
يـ إمّا فرح ب|أسبابي ..
يـ إمّا حزن و ,
ب|أسبابي ..

ويصبح هالقبر بيتي ..
ولا حد منهم يذكر ,
أنا وش كنت أعني له ..
أنا في يوم مرّيته ..
أو إني متّ وحداني ..

وياكثر الـ [ متى ] فيني !
إلين أتعبت إحساسي ..
على { ناسي ,

http://s111t.com/vb/downloads//14_fhm.gif

رزان العتيبي

08-16-2009, 03:12 PM

أسخف مواقفنا هي أوقات الوداع
ـــــ يوم كلٍ ودّع الثاني بـ { دموع

لا تقول [ أرجع ! ] ولا أقول إلتياع
ـــــ الحكاية وقت / حب ثاني / خضوع

الفرق إنّي رويتك ب { إقتناع
ـــــ والمصيبه صاحبي م أنت ب|قنوع

قلت رايح تجمع [ إحساسك ] وضاع
ـــــ قلبي اللي صاح ف|بعادك جزوع

لاتردّ أرجوك يكفي { إنصياع
ـــــ لا تجي للدرب مابي لك رجوع

http://s111t.com/vb/downloads//14_fhm.gif

رزان العتيبي

08-18-2009, 06:21 PM

تجون نعيش !
نعلّم حلمنا التطنيش ,
ولا نسأل عن الحاضر ..
ولا نحكي عن الماضي ..
ولا نزعل على الأحباب ..
نداري دمعة الأصحاب ..
ونقتل صمت أحرقنا ..
وخلّانا وراه نطيش !

http://s111t.com/vb/downloads//14_fhm.gif

رزان العتيبي

08-20-2009, 03:25 AM

على ذاك الرصيف اللي تحمّل دعسه رجولك
ـــــ وقفت أشكي من غيابك وردّ اليوم هو ناسي
سألت الليل عن صمته وليش اليوم مو حولك !
ـــــ رحل من دون لايحكي وزاد هموم في راسي

http://s111t.com/vb/downloads//14_fhm.gif

رزان العتيبي

08-30-2009, 04:22 AM

هالحين جاي وتطلب إنّي أسامح !
ــــــ وينك من أوّل يوم أنا ميّته فيك ؟!
وينك من أوّل يوم أنا ميّته فيك ؟!
وينك من أوّل يوم أنا ميّته فيك ؟!
وينك من أوّل يوم أنا ميّته فيك ؟!

http://s111t.com/vb/downloads//14_fhm.gif

رزان العتيبي

08-30-2009, 04:23 AM

مدّيت لك يدّي أبي خبزة وصال
ــــــ تسدّ جوع الفقد ليما ألآقيك !

http://s111t.com/vb/downloads//14_fhm.gif

رزان العتيبي

08-30-2009, 04:24 AM

معاد يحسّ بي حلمي / ولادمعي / ولا الكرّاس
ـــــ وحتى الضّيق في صدري [ نسى ] قد إيش أعني له

وشعري جيت أبشكي له لقيت إنّه بدون إحساس
ـــــ تجرّع من [ قساوتهم ] زهد في شرع تشكي له

http://s111t.com/vb/downloads//14_fhm.gif

رزان العتيبي

08-30-2009, 04:24 AM

فيّروز غنّت [ أنا عندي حنين ]
ـــــ في كلّ نوته شعرت إنها تغنيني

عندي حنينٍ لكن مااعرف لمين !
ـــــ هو له ! أو لي ! أو ل أيام تعنيني !

http://s111t.com/vb/downloads//14_fhm.gif

رزان العتيبي

09-05-2009, 06:04 AM

مجرد نصيحة لا أكثر !

لاتشبّه في [ حبيبك ] قلتها لك وإنت حُرّ
ــــ ل أنك بتخسرك أوّل قبل ماتخسره فيك !

هي للجميع :)

http://s111t.com/vb/downloads//14_fhm.gif

رزان العتيبي

09-20-2009, 04:39 PM

ماأبي أفرح ولا أبي أيّ عيد ..
ــــ وش أبي بالعيد دامك مو معاي !

كلّ شيٍ جاد به مابه جديد ..
ــــ نفسه غيابك ونفسه هو بكاي !

http://s111t.com/vb/downloads//14_fhm.gif

رزان العتيبي

09-20-2009, 04:42 PM

عيدي الليلة حزين ,
لا / كِسرة من حنين ..
عيدي الليلة أناني ..
فيه أماني / وغايبين !

يسأل جروحي | رجع !
جاب لك فستان عيد ..
والّا ذكرى من | وجع !
دايم لحزنك تعيد ..

وأختنق به ..
يوووه ماتدري ب إنّه ..
صار جافي ,
صار قاسي ,
صار ناسي ,
صار ب إحساسه غريب ..

والعجيب اللي ذهلني ..
إنّه دايم لي قريب ..
بس بعيد ..
كيف !
مدري !
لاتواخذني بجهلي ..

و صرت أهذري ..

ياصاحبي وش فيك
ـــــ ماجيتنيي بالعيد !
جرحك مهو مخلّيك
ـــــ والّا غياب جديد !
ـــــ والّا غياب جديد !
ـــــ والّا غياب جديد !

تنهيدة ,
قلّي صباح العيد
ــــ وشلون تب تقضيه !
وأنا وإنت بعيد
ــــ ياصاحبي بس ليه !

http://s111t.com/vb/downloads//14_fhm.gif

رزان العتيبي

10-15-2009, 11:34 PM

http://1.bp.blogspot.com/_YdRSFYXcDLU/SJ9tFPJzCjI/AAAAAAAAAfc/k8BaGqqH1zQ/s400/coffee-cup1.jpg

كنت أنا أشرب قهوتي | سكر زيادة
ــــــ وكان طاريك افْ خيالي بسكويت

ومن بعد غيبتك صارت مرّة سادة
ــــــ وصرت أصرّخ من حدودي للـ [ كويت ]

http://s111t.com/vb/downloads//14_fhm.gif

رزان العتيبي

01-26-2010, 10:37 PM

http://i49.tinypic.com/24plafs.gif

أشوفك في شوارعنا تمرّ .. ولا أثر تترك !
مَ غير آهات جمّعها الرّصيف .. اتمثلت قنديل ,

تضوّي ليلي بـ همسة [ فراقي كان لك أبرك ] ..
من وجودك بِـ ردهات التّعب .. متلحفة هالليل !

http://s111t.com/vb/downloads//14_fhm.gif

رزان العتيبي

01-26-2010, 10:37 PM

http://i45.tinypic.com/2cfzbti.jpg

تعال : شف وش نبت في غيابك !
...... وردة تعب , أشمها لا ذكرتك !

http://s111t.com/vb/downloads//14_fhm.gif

رزان العتيبي

01-26-2010, 10:38 PM

http://i46.tinypic.com/dxd6aa.png

يجيك الذل : من أقرب بشر في دنيتك | وتنام ,
عسى نومك يبدد لك : ضياعٍ سبّبوه اقراب !

وتاخذ من عمر صبرك : لحاف | ومسندة أحلام ,
ايلين تغيب عن نفسك , ولا تذكر جرح وأحباب !

http://s111t.com/vb/downloads//14_fhm.gif

رزان العتيبي

01-26-2010, 10:38 PM

كبرت / وضاقت أحلامي !

http://i49.tinypic.com/28t89r4.png

كل ليلة : أجمع أحلامي وأنام ,
يمكن ألقى في حلومي منفعة !

أترك الواقع | أقول إني تمام ,
والحقيقة : مالقيت أيّة سعة !

أرشي الأفراح بشويّة سلام ,
والنتيجة : قلب أحزانه معه !

http://s111t.com/vb/downloads//14_fhm.gif

رزان العتيبي

01-26-2010, 10:39 PM

http://i49.tinypic.com/214wb6.png

خان الحكي صمتي , وجيتك أستشير ,
من هو رحل ظنّك يبي يرجع : يعود !

http://s111t.com/vb/downloads//14_fhm.gif

رزان العتيبي

02-28-2010, 04:30 AM

http://shtaat.jeeran.com/Kuwait-9999.gif

للـ كويت !

هذي الـ كويت ! إن جيت أبي أكتبها ,
هجّت حروفي خوف : مدري ضيقة !

لا حس يكفي وإن بغيت أسكبها ,
عانيت أنا من حدسي | وتـ لفيقة !

كلمة بسيطة , والله أستصعبها ,
لـ أنها كبيرة : والـ كذب لا ما اطيقه !

ياحرفي إصحى ردّ لي : م أصعبها ,
أنثر غلاها , ماهي بـ تصفيقة !

هذي الـ كويت ! أكبر بها وبـ حبها ,
يـ الله تْحَفِظْها للـ زمن | وتعيقه !

كل شخص ناوي إنه يـ خربها ,
يارب حلمه يصعب بـ تحقيقه !

http://s111t.com/vb/downloads//14_fhm.gif

رزان العتيبي

03-02-2010, 02:36 PM

كلمة بسيطة , والله أستصعبها ,
لـ أنها كبيرة : والـ كذب لا ما اطيقه !

الـ عُذر لم أنتبه لزيادة كلمة لا في الشطر الثاني ,
مما تسبب في كسر الـ شطر ..

كلمة بسيطة , والله أستصعبها ,
لـ أنها كبيرة : والـ كذب ما اطيقه !

http://s111t.com/vb/downloads//14_fhm.gif

رزان العتيبي

08-24-2010, 07:11 AM

منهو ياخذ بيدي إلى الـ نسيان
إلى هذا الـ حديث الـ كان
إلى صوته .. إلى سكوته
إلى نبرة عتب وأشجان

منهو يسرق أحزاني
ويرميني على باب الـ فرح بُرهة ,
وأحسّ إني حقيقة : مو تعب وأوهام !

منهو يسرق الـ ذكرى !
وياخذني إلى بكرى ؟!
ويجمع كل تفاصيلي .. من أوّل حرف بكتابي ..
إلى الـ فهرس ..
ويقرا شيء مايُقرا ..
تمكن داخلي ضيقة ..
وذنبٍ ماعُفي للآن ..

ياحيرة هالفكر ملّيت ..
من إحساس الـ غبن فيني ..
ومن نظرة عدّويني ..
وشماتة عالمٍ كانت : تحبني بس تكويني !

وتسألني عيون الناس : أنا منهي ؟!
وأجاوبهم ,

أنا من موطن الأوجاع ..
كنت أنبت : سنابل قمح ..
لكن ماحضنت موسم حصاد ..
ولا رمتني ريح تكسر : باقي أغصاني ..
عشان أعيش من أوّل ..
نبض يتمنى يتنامى بتربة : مودها الـ ضحك الكثير ..
أبتلف سنيني !

كثيرة أمنياتي الـ يوم ..
يادنيا : مااعدلت بي يوم ,
طغى فيها ظلم روحي ..
وصارت بالـ صمت تمحي | أيام الـ طُهر فيني !